... سيبو الراجل يا

سيبو الراجل خلي روح لدارو، يا رسول الله على تصويرة يتوقف ويدخل للحبس. تصويرة يا بو قلب ولات توزر ناشرها وبعد الثورة زادة؟!

إي نعم الصحافي يدخل للحبس إذا كان مس من "الأخلاق الحميدة"، خليه يكون عبرة لمن يعتبر فماش ما إعلام العار هذا يفهم روحو ويسكر فمو ويخلي حكومة الخليفة السادس الضحوك المكشخ تخدم على روحها. اليوم تصويرة دخلت ناشرها للحبس ، غدوة لافتة إشهارية بتاع شمبوان ما تفكش مولاها من مؤبد... أما إلي يبدى ولا تبدى  لابس ولا لابسة مريول عليه تصويرة ولا بد مثلاً قارورة هاينيكان ولا طرنكوشة فاتنة كشكيرا الكولومبية فإنو جماعة الأمر بالمعروف والنهي عن المنكر سوف يكونون لهم بالمرصاد بقيادة سي عادل العلمي إلي فضل ما يحكيش على ثورة لأن ما حصل نهار 14 جانفي هو "فتح رباني" بأتم معنى الكلمة والتصويرة.

والله شيء يدوخ فيك يا نيابة يا عمومية، وجدي غنيم صال وجال في البلاد من الكبارية لصفاقس، وتمنى الموت للعباد " موتوا بغيظكم"، وكفر وسب وقشتل وفرق وتمسخر على حماة الحمى  ، ولا إستدعيتوه ولا درتو بساحتو، وسي نصرالدين على تصويرة، إيه نعم على تصويرة إيبات في Geôle و يحطولو menottes كالمجرمين إلي مثلاً يغتصبو الصغار ثم إدبروها بعفو عام ولا خاص على راس الثورة المجيدة.

سيبو الراجل خلي روح لدارو يلي حولتو وجهة الثورة و رديتوها ردة عل حرية...

سيبو الراجل خلي روح لدارو يالي مطفين الضو على رموز الفساد وقاعدين تعملو في مفاهمات تحت الطاولة مع إلي سرقو البلاد. 

ما عينكمش بش تفكو من توظيف الأخلاق الحميدة ...تلعبو على تصاور ونهار نهارين تلعبو  عل حبلين.

يا نيابة يا عمومية، إذا كنت صادقة مع روحك، علاش وكيفاش ما إستدعيتش سي توفيق بن بريك بش تسائلو على محتوى جريدة "ضد السلطة " ... زعمة تصويرة "التونسية " أشنع بالنسبة ليك من كلام ورسوم "ضد السلطة" ؟ اه نسيت ، توفيق ما تنجموهش كاسح عليكم وعندو شرعية نضالية. كان ادورو بيه لما يعمللكم شوهة وعرعور "ما ينتهيش" كيما تقول المطربة شهرزاد...

سيبو الراجل خلي يروح يا...

ج مغشش